La Felguera pon n'escena "L'Encierru"

El Nuevu Teatru La Felguera acueye güei sábadu 5, a les 20:15 hores la obra "L’Encierru". La obra "L’Encierru" tien llugar nos primeros años de la transición, cuando un grupu sindicalistes pertenecientes al comité nacional d’una organización sindical, decide encerrase nun pozu mineru pa denunciar una serie problemas esistentes nel sector.  
 
"L’Encierru" fala de les hores vivíes por unos sindicalistes mineros dientro un pozu’l Valle’l Nalón. L’encierru llévenlu a cabu pa forzar una negociación sindical cola empresa tres dellos meses de fuelgues y movilizaciones; y cuenta les rellaciones personales que surdieron ente los sindicalistes y cómo la so cultura sindical llega a condicionar les sos vides y les de tolos de la so rodiada. L’Encierru tamién cuenta cómo s’incorporaron les muyeres un mundu tan machista y lo difícil que-yos fue sobrevivir nél.
 
La representación coincide cola entrega de la medaya de plata que l’Ayuntamientu de LLangréu concede al Grupu Teatru Kumen pola so trayectoria enriba les tables, más de 20 años de trabayu y 50 obres de teatru estrenaes. La obra ta dirixida por Jose Ramón López Menéndez, autor tamien del testu orixinal.