Cultura reduz casi'l 20% el so presupuestu total, y un 11,3% el de Política Llingüística

La conseyera de Cultura del Gobiernu asturianu, Mercedes Álvarez, anunció güei un recorte de casi'l 20% del presupuestu de la so cartera, con una inversión de 117,8 millones reservaos pal próximu exerciciu, y qu'inclúi una reducción del 11,3% en materia de Política Llingüística. La responsable autonómica dexó claro que pese a esta rebaxa nun se paralizó nengún proyectu y que se dio prioridá a les reducciones de fondos, afectando en menor midida a les "más importantes" árees, como la Fundación de los Premios Príncipe d'Asturies, la Selmana Negra, la Política Llingüística, el Centru Nimeyer o la ópera, y siendo más acentuada n'otros campos como'l de La Llaboral, proyectu que yá considera que yá algamo un nivel de desarrollu aceptable.

Asina lo esplicó demientres una rueda prensa na qu'esgranó les cuentes que la Conseyería de Cultura prepara pal próximu añu 2010. Álvarez quixo unviar sicasí un "mensaxe de tranquilida al sector turísticu y cultural, porque son una de los principales partíes esenciales pa les ayudes a los sectores profesionales, y les inversiones que permitirán poner en marcha nuevos proyectos".

"Hubo un axuste de sovenciones, pero nun foi llinial. Dientro de los capítulos dimos prioridá a les más importantes, que tienen una reducción del 10%, como la opera, la fundación de los premios, la Selmana Negra", matizó la conseyera, que tamién cifró nun 11,3% la reducción del presupuestu de Política Llingüística.
  
Nesti casu, cifró en trés millones el presupuestu destináu, dientro del que destacó los 261.000 euros que "asegurarán el caltenimientu" de los servicios de normalización de los diferentes territorios, recalcando amás qu'esti añu se punxeron en marcha otros cinco d'estos equipamientos".
  
Cifró  tamién en 230.000 euros el presupuestu destináu al funcionamientu de l'Academia de la Llingua, que "permitirá desarrollar la so actividá demientres tol añu 2010, si bien reconoció qu'esti apartáu baxa un 8%".
  
Pel contrario, esplicó que "hai otres árees como la Llaboral, que tien más del 20% de rebaxa, porque tuvo un desarrollu y ye'l momentu d'axustalu", matizó. Sicasí, recordó que continuarán los trabayos de refuerzu del so equipamientu.
  
Álvarez recalcó les principales inversiones que se prevén nes sos cuentes, ente les que destacó un total de cuatro millones d'euros pa la industria cultural asturiana. Citó asina empreses y entidaes de tou tipu de creación artística, como musicales, editoriales o teatrales. "Son una prioridá estratéxica. Destinamos un refuerzu exemplar pa esti sector, que mueve ente'l 3,5% y el 4% del PIB asturianu", comentó.
 
CENTRU NIEMEYER
Destacó de la mesma manera, el caltenimientu de la inversión pa equpamientos d'importancia, como'l complexu Oscar Niemeyer, pal que se reservern 12,9 millones d'euros, un puntu "memorable pa la cultura n'Asturies". Nesti asutnu, tamién se refirió a l'ampliación del Muséu de Belles Artes n'Uviéu, pal que se reserven cuatro millones d'euros, o la inauguración del Archivu Históricu d'Asturies, y el Muséu Arqueolóxicu. El primeru abrirá les sos puertes na primavera d'esti añu y el segundu a últimos del 2010, según les previsiones de la conseyería
  
Nel apartáu d'equipamientos, comentó otros proyectos culturales relevantes pa zones d'Asturies, como la restauración de San Salvador de Valdediós, o la ilesia de Santibanes, n'Ayer, y l'acabación de les obres de centru d'arte rupestre de Tito Bustillo, pa la que se reserven 4,3 millones d'euros.
  
Por apartaos, la conseyera calcó especialmente nos 38,6 millones reservaos pa les polítiques de promoción cultural y pal desarrollu d'archivos, biblioteques y museos. Tamién señaló los 18 millones d'euros pa la promoción turística, otru sector que consideró clave, y el que destacó'l Plan de Turismu Gastronómicu, una iniciativa na que recordó qu'Asturies "ta sirviendo de modelu pa otres comunidaes".
  
Con respeuto a les polítiques patrimoniales anució un gastu de más de 19 millones d'euros, tando Asturies "a la cabeza, en cuanto a inversión per cápita, con 15,8 euros por habitantes, frente a la media estatal, de 13,2".