Les redes sociales nun falen asturianu

Dende ayeri xueves, la rede social Tuenti, una de les más usaes pola mocedá, incorpora’l gallegu, el vascu y el catalán como idiomes d’usu. Amás d’usar estos idiomes pa les ferramientes web, el serviciu d’asistencia tamién va atender en cualesquier llingua del Estáu, pero si ésta tien la consideración llegal de la oficialidá, yá que Tuenti nun contempla l’usu del asturianu.  

Esta rede social, qu’entamó fai tres años, cuenta con unos siete millones d’usuarios y ye la gran competidora n’España de Facebook. Esta última, ye quiciabes la rede social más usada del mundu. Ufre a los usuarios gran bayura d’idiomes d’usu, inclús llatín, y ente ellos tán les otres llingües del Estáu, menos l’asturianu.
 
Sicasí, nesti último casu, los usuarios asturfalantes de la rede nun queden quietos viéndoles venir. Asina, el grupu “Queremos Facebook n'asturianu! We want Facebook in Asturian!” cuenta con 2.281 miembros. El grupu tien abiertu un tema nel foru de suxerencies de versiones de la rede social, con dellos mensaxes solicitando la versión na nuesa llingua, pero los responsables de Facebook tovía nun dieron nenguna respuesta.
 
Mientres qu’otru más modestu nomáu “We claim a Facebook language option for asturleonese”, con 81 miembros, nun quier quedase atrás y ta acabantes d’empobinar una campaña pa solicitar a los responsables de la rede social l’usu del asturianu. Pa ello, pide a los usuarios que pongan de semeya del so perfil una simulación de cómo quedaría Facebook n’asturianu. Los responsables de la iniciativa asitien la campaña ente’l dos y el nueve d’avientu.
 
Too sía por que dalgún día les redes sociales, quiciabes la versión moderna del conceyu abiertu o versión on-line del chigre, falen tamién n'asturianu.