UNA va inxertar nos sos principios el manifiestu en defensa de los drechos fundamentales d'internet

|

El coordinador d'Unidá Nacionalista Asturiana, Miguel Ánxel Díez, anunció al traviés d'un comunicáu que la so organización va inxertar nos sos principios el manifiestu en defensa de los drechos fundamentales d'internet. La organización cuenta facelu nel so alderique congresual, que tendrá llugar en febreru de 2010.

Díez dixo que'l so partíu considera l'usu d'internet un drechu básicu y fundamental. Poro, comparte la molición de los usuarios poles intenciones d'un gobiernu "con ansies d'inquisidor" aprobando la midida ensin alderique y con nocturnidá, "incluyéndola nunes midíes de reforma económica".

UNA quixo facer un apueste pol fomentu del software llibre, "qu'amás de suponer un notable aforru económicu permite un desendolcu más rápidu y garantiza l'accesu a la rede d'un númberu mayor de ciudadanos". Lo que pa los nacionalistes diba permitir el desendolcu d'empreses locales del sector ITC, favoreciendo la creación de puestos de trabayu estables y xeneradores de valor amestao.

Contador Estadistiques