UNA culpa a les alministraciones de nun evitar el pieslle de Juliana

Pa la portavoz d’UNA en Xixón, Yolana González, el pieslle de Juliana podía evitase con una correcta xestión política, polo que culpa a los responsables políticos “de dexar albentestate a los trabayadores del sector naval”, citando sobre too al secretario xeneral del PSOE xixonés, José Manuel Sariego, que según la organización ausentóse de les manifestaciones cuando entá se podia lluchar pol naval y agora ofrezse a encabezales.

Pa la portavoz d’UNA, el Principáu y el propiu Conceyu son unos “combayones” de les decisiones de Madrid, faciendo tamién responsable al Presidente del gobiernu central, “por más qu'eses decisiones seyan nefastes pa la ciudá y supongan un incumplimientu de toles promeses feches hasta agora”. Pa González  “la única voluntá política ye la de pesllar el sector naval de Xixón, por muncho qu'agora los responsables políticos, aparezan n'escena con nueves promeses y palabres tranquilizadores.”
 
Pa los nacionalistes el pieslle de Juliana ye llamentable pa la ciudá, “que ve cómo se zarra ún de los sectores más importantes del texíu productivo d'Asturies cuando ye un sector n'auxe a nivel mundial”. La organización calificó como irónicu que s’apueste pola regasificadora “siendo como ye evidente que va crear menos puestos de trabayu estables que los que se tán destruyendo nel sector naval” no qu'en palabres de la portavoz d’UNA “nun fai otro que'amosar una vegada más l'absoluta falta de coherencia de los que nos gobiernen”. González tamién acusó a Vulcano como ún de los principales responsables del pieslle, destacando que “el propiu informe de los alministradores concursales amuesa la mala fe de Vulcano”