Iglesias diz que la Llei de Llingües lleva pendiente 30 años y percibe que "hai una mayoría parlamentaria p'aprobala"

El presidente del Gobiernu d'Aragón, Marcelino Iglesias, recordó güei que l'aprobación de la Llei de Llingües ta pendiente dende hai 30 años, dao que'l primer Estatutu d'Autonomía, que data de 1982 yá establez la obligación de regular la proteición de les llingües minoritaries. Amás, dixo percibir que "hai una mayoría parlamentaria que permitirá aprobala".

Nun cortu alcuentru colos medios de comunicación, nel Edificiu Paraninfo de Zaragoza, el xefe del Executivu autónomu aseguró que la mayoría existente nes Cortes d'Aragón favorable a protexer les llingües minoritaries, "va facese visible y tendremos una llei", tres lo que recalcó'l so interés n'utilizar la denomación filolóxica de catalán pa designar la llingua falada na franxa oriental.

"El mio partíu solu nun tien votos bastantes, pero nel Parlamentu toi convencíu de qu'hai una mayoría que quier esa llei", anque precisó qu'unos partíos quieren dir "más allá" y otros "menos", lo que tamién se pondrá de manifiestu. El presidente aragonés aprovechó pa celebrar la "normalidá" con que se desarrolló esti alderique, qu'hasta agora foi "serenu". Iglesias reocnoció que'l debate nun foi "tan apasionáu como m'imaxinaba".