Andecha Astur solicita la paralización de la construcción de la regasificadora por falta de llicencia municipal

La organización Andecha Astur sumóse güei, al traviés d'un comunicáu, al pidimientu de la Coordinadora Ecoloxista d'Asturies fechu tanto a l'Autoridá Portuaria de Xixón, como al conceyu pa que se paralicen "darréu" les obres de construcción de la regasificadora n'El Musel que, según dambos, nun cuenten cola llicencia municipal correspondiente pa la so execución.

Andecha Astur recordó na nota'l refugu vecinal a una regasificadora que consideren "innecesaria y peligrosa". De la mesma manera, esta organización apuntó a la posiblidá de que les prieses por entamar les obres obedezan a un intentu de "saldase la normativa con una política de fechos consumaos".

Tamién recalcaron el fechu de que siga sin respuesta'l pidimientu d'información sobre les característiques de la regasificadora y les sos potenciales peligros, solicitada pol Platafomra Regasificadora Non. Andecha afirmó nel comunicáu qu'esti tipu d'instalación debe tar polo menos a dos kilómetros de distancia de cualquier nucleu pobláu y destacó les consecuencies "catastrófiques" que pue suponer pa los barrios de Muselín, Pescadores, Xove y La Calzada, en casu d'accidente.