“No hablamos catalán” pide al PP y PAR que dexen la ponencia parlamentaria sobre la Llei de Llingües d’Aragón

La Plataforma “No hablamos catalán” pidió-y ayeri, ún d’avientu, a los grupos del PP y PAR nes Cortes d’Aragón l’abandonu de la ponencia parlamentaria sobre la Llei de Llingües d’Aragón, yá que cola aprobación de la denominación de catalán que supón l’artículu 2 “elimínase l’aragonés que se fala na zona oriental y yá nun val la pena discutir namás”. Pa la Plataforma, los dos partíos “nun foron invitaos a la función” y van ser los aragoneses y les urnes “los encargaos de xuzgar esta imposición”.

El presidente de la Plataforma, Lorenzo Pastor, camienta que “tolo que se faiga depués de que s’apruebe l’artículu 2, ye un trabayu nulu y una perdida de tiempu. Siguir trabayando nesa ponencia ye trabayar a la contra de los intereses de los aragoneses y meyor ye que trabayen pa solucionar la falta d’emplegu, meyorar les condiciones de los ciudadanos y por consiguir que vuelvan les obres d’arte sacru”.

Pal secretariu institucional de NHC, Ángel Hernández, nel momentu que s’aprueba que lo que falen ye catalán “tán pisotiando los drechos de miles d’aragoneses de la zona oriental, amás d’abrise la puerta a la reivindicación territorial de los Países Catalanes”. Del mesmu mou, pidió valentía a populares y aragonesistes pa denunciar “públicamente y ensin nengún complexu l’aragonesidá de la zona oriental”.  

Dende “No hablamos catalán” tamién quixeron felicitar a la presidenta del PP d’Aragón, Luisa Fernanda Rudi, por comprometese’l pasáu llunes a camudar la Llei si ye la próxima vencedora de les elecciones autonómiques.