El Rock & Gas reivindica l'usu cultural de la Fábrica de Gas d'Uviéu pa "dar emburrión" a la capitalidá 2016

El Foru d'Urbanismu Críticu d'Uviéu, en collaboración col Conseyu de la Mocedá del Principáu, organizará los díes 3 y 4 d'avientu dos nueches de conciertos gratis, que baxo'l títulu 'Rock & Gas', reivindicarán un usu cultural de l'antigua Fábrica de Gas d'Uviéu que daría "un emburrión a la candidatura de la ciudá a la capitalidá europea de la cultural nel 2016".

Asina lo aseguró güei en rueda prensa'l voceru del Foru d'Urbanismu Críticu, Diego Díaz, qu'esplicó que la Fábrica de Gas podía ser "la tercer pata del triángulu asturianu formáu por La Llaboral y el Niemeyer".

La iniciativa valdrá, según Díaz, pa "amplificar" la reivindiación del Foru y "amestar les voces vecinales y culturales nuna ciudá onde la cultural alternativa ta nuna situación llamentable".
  
El conciertu del día 3 tendrá llugar en La Antigua Estación a les 23.00 hores, y contará coles actuaciones de 'Bueno', 'The Perloras', Edu Vázquez y 'Muñeco Vudú'. Pablo Valdés, 'Mystereo' y 'Mamy Carter', son dalgunes de les actuaciones programaes pal conciertu del día 4 de les 20.00 hores en La Calleja de la Ciega.
  
Pela so parte, el presidente del Conseyu de la Mocedá d'Asturies, Paulino Feito, fizo referencia demientres la so intervención a la resolución aprobada pola última Asamblea Xeneral del Conseyu, na que, según Feito, acordóse encamentar a la Conseyería de Cultura y Turismu a adoptar una posición "clara" y una "política eficaz" pa que la Fábrica de Gas nun acabe valtada nin el so suelu recalificáu, sinón que se conserve como "testimoniu del pasáu industrial de la ciudá", y destinada a usos culturales.
  
El voceru d'Asciz, Roberto Sánchez Ramos, aseguró que "Uviéu nun pue vivir sólo de la llírica". La ciudá, que según Sánchez Ramos "nun tien nada qu'esponer na so candidatura a la capitalidá europea de la cultura", debería dar cabida a proyectos culturales alternativos, "que na mayoría de los casos van pa Xixón".