El Principáu pierde una sentencia sobre los servicios mínimos nel enseñu

|

La sala de lo Contenciosu Alministrativu del Tribunal Superior d’Asturies vien de da-y la razón al sindicatu educativu SUATEA contra la resolución de la Conseyería d’Educación del 27 de marzu de 2009, que se declara nula por vulnerar el drechu de fuelga. Según el Sindicatu, la resolución fixaba nos servicios mínimos abusivos y tenía como fin impidir que’l profesoráu exercitara’l so drechu constitucional a la fuelga.

El documetu d’Educación recoyía unos servicios mínimos nos que s’incluyía’l direutor y/o Xefe d’Estudios o Secretariu. Nel casu de les escueles fogar y centros d’educación especial afitábase que tol profesoráu tuviera nel so puestu, nos centros rurales a un docente por localidá, en Primaria ya Infantil ún por cada tres unidaes, y na ESO a ún por cada cuatro unidaes.
 
La sentencia reconoz qu’unos servicios mínimos como los establecíos nun se xustificaben, llegando inclús a impidir el drechu de fuelga nes escueles fogar y educación especial. Polo que’l sindicatu ta gayoleru y esixe a l’Alministración que tenga dicha sentencia en cuenta.

Contador Estadistiques