Escocia quier celebrar un referendu sobre la independencia d'Inglaterra

El primer ministru d'Escocia, Alex Salmond, publicó esti llunes los detalles d'un referendu sobre la independencia escocesa. Salmond, que dirixe'l Partíu Nacional d'Escocia (SNP), afirmó que sólo la independencia daría "una collaboración d'iguales propia del sieglu XXI ente Escocia y Inglaterra". El llibru blancu, tituláu 'La to escocia, la to voz', allana'l camín pa que s'adopte un proyectu de llei a primeros del próximu añu y se dea la votación nunos doce meses.

Esti proyectu dispón d'un ampliu abanicu d'opciones, incluyíu la de caltener una autonomía llendada, más traspasos de competencies pa Escocia, una autonomía fiscal mayor mientres sigue formando parte del Reinu Uníu, y la independencia. Pero'l so Gobiernu en minoría enfréntase a una llucha por algamar que'l proyectu de llei s'apruebe nel Parlamentu escocés, puesto que'l restu de partíos principales opónense al mesmu, dao qu'aseguren que'l país necesita centrase na recuperación económica.

"L'alderique nes polítiques d'Escocia nun ye ente cambiar o nun cambiar, ye sobre'l tipu de cambiu que queremos, y el derechu de la xente a elixir el so futuru mediante un referendu xustu y llibre", indica Salmond nun comunicáu.
  
Según el primer ministru escocés, necesítensen más competencies pa enfrentase a la recesión. "La gran mayoría de xente quier aumentar la responsabilida del Parlamentu, asina tendríamos más poderes pa facer más por Escocia, el poder económicu y financieru pa combatir la recesión y apoyar la recuperación, el derechu a falar por Escocia n'Europa", añade.
  
El primer ministru afirmó qu'esti llibru blancu ofrez una oportunidá más detallada pa la independencia. Si'l proyectu de llei fracasare, Salmond asguró que la llucha pola independencia tornará nuna cuestión clave nes próximes elecciones, que se celebrarán nel 2011