El plazu de presentación pal premiu de relatu cortu de Cangas del Narcea acaba la próxima selmana

El Serviciu de Normalización Llingüística del Ayuntamientu de Cangas del Narcea zarrará'l próximu vienres, 11 d'avientu, el plazu de presentación d'obres del so VII Concursu de Relatos Cortos en llingua asturiana normativa o asturianu occidental.

Los responsables del mesmu ficieron la pasada selmana un llamáu a la participación nesti certame, pa incrementar el númberu d'orixinales que se presenten nes dos próximes selmanes.

El tema del concursu ye llibre. Les obres nun han tener menos de cuatro fueyes y más de 20, y han tar mecanografiaes a doble espaciu per una cara en DIN A4.
  
Los orixinales han presentase o mandase por corréu certificáu, por triplicao, al Serviciu de Normalización Llingüística de Cangas del Narcea, nel númberu 13, baxu, de la cai Uría d'esta población, enantes del señaláu día 11. Los trabayos han dir nun sobre sin remitente que lleve otru zarráu dientro nel que s'incluyan los datos personales del autor.
  
Habrá dos ganadores, ún en llingua asturiana y otru na variante occidental. Caún d'ellos llogrará un premiu de 400 euros. El fallu daráse a conocer a últimos d'avientu o primeros de xineru.