Los ecoloxistes denuncien l'autorización ambiental de la mina de Boinás (Miranda)

La Coordinadora Ecoloxista d'Asturies vien de denunciar que'l Principáu notificó-y que nun va atender el recursu que presentaron en xunetu de 2008 contra l'autorización ambiental de la Planta de Tratamientu de mineral, asitiada nel Complexu del Valle Boinás (Miranda).

La Coordinadora opónse a que'l Principáu mantenga l'autorización ambiental, porque nun ta acreditada la inocuidá del sistema de lixiviación del mineral de menor riesgu. Los ecoloxistes fundamenten la so oposición nos documentos presentaos pola sociedá Kinbauri España S.L, propietaria de la esplotación, onde s'esclaria que cuenten tratar minerales de les mines de Boinás y de Carlés (Salas), pero tamién de mineral importáu.

Recuerden que l'autorización de la empresa de 1996 nun fala de tratar minerales importaos y qu'en Balmonte tuvieron años tratando mineral trayíos de Groenladia, col correspondiente impactu ambiental al almacenar los residuos del procesu.

La Coordinadora fala del peligru d'escape de residuos de les balses de llodos, dalgunos mui peligrosos pol procedimientu de lixiviación de cianuros. Dos balses d'almacenamientu de les cueles la más grande de 4.700.000 metros cúbicos de capacidá, foi realizada, según los denunciantes, irregularmente en 2005 ensin les correspondientes llicencies. Amás da tar asitiada nuna lladera y una zona d'alta permeabilidá, na cuenca del ríu Narcea.

Los ecoloxistes tamién recuerden l'impactu sobre unes agües qu'abastecen a Balmonte, pero tamién a la fastera d'Avilés. Amás, falen del impactu sobre los numberosos animales protexíos al tar la esplotación dientro del área de distribución del osu pardu. Esclarien que l'anterior propietaria yá fora denunciada por delles entidaes pola perdida de calidá de les agües del ríu Cauxa mientres les obres y la fase d'esplotación.