El CUPA felicita a Gotor pol so nomamientu como patronu de la Fundación Caveda y Nava
|
27 Payares, 2009 por Damián Barreiro
- Inicie sesión o rexístrese pa espublizar comentarios
El Conceyu Universitariu pol Asturianu (CUPA) vien d’amosar la so gayola pol nomamientu de Vicente Gotor, Rector de la Universidá d’Uviéu, como patronu d’honor de la fundación Caveda y Nava, distinción que se fairá efectiva mañana 28 de payares en Villaviciosa. Pal CUPA’l nomamientu supón un reconocimientu a los pasos yá daos nel primer añu y mediu de mandatu del cabezaleru universitariu, pero sobre manera a les espectatives abiertes pol Rector pa la normalización del asturianu.
Sicasí, el CUPA quier espresar que ye’l momentu d’acelerar eses polítiques llingüístiques na Universidá “con nueves midíes que sirvan pa normalizar l’asturianu na Institución”. La organización universitaria recuerda que sofitó la campaña de Gotor y que trabaya col equipu rectoral nos avances del idioma. Del mesmu mou, el CUPA reseña que va unviar al actu de Villaviciosa a representantes de la so organización pa felicitar al Rector, pol nomamientu, y a la Fundación, “polo acertao de la decisión”.
Efrén d'Andrés
Comentarios
Ta perbien que xente público non venceyada al asturianismu se posicione a favor. Esa ye lo que mos da puntos de verdá. Esperemos que la Uni onde fuimos dellos años camude pa reconocer la llingua del país onde ta y non esi otru impuestu.
Norabona.
Totalmente cierto. Aunque tamién ye verdá que nel so equipu rectoral hai dellos vicerrectores mui averos a la llingua.
Per un llau parezme perbién que xente como Gotor y otros que nun son asturianos tean a favor y puxando pola llingua, pero pero otru llau me da bastante vergoña que tenga que ser xente de fuera los que tengan que facer eso mientres que abondos asturianos pasen del tema o la desprecien.
En fin, toles manes son bienveníes pa esto, la mio felicitación a Gotor por ello y pol campus d'escelencia, con Vázquez enxamás lu tendríamos.