L'Axencia Europea pa les Llingües Minorizaes encamienta a Feijóo que "ponga fin" a les sos midíes "contra'l gallegu"

El Comité del Estáu español del European Bureau for Lesser-Ussed Lenguages (Axencia Europea pa les Llingües Minorizaes) encamentó güei a la Xunta de Galicia que "ponga fin a les inciatives que tomó nos últimos meses a la escontra del idioma gallegu".

La entidá, promovida pol Parlamentu européu y que tien rangu d'entidá consultiva d'esta institución, del Conseyu d'Europa y de la ONU, caltuvo un conceyu ayeri en Barcelona tres el que consideró "d'especial gravedá" que l'Executivu gallegu "nun tenga en cuenta l'últimu dictame del Comité d'Espertos del Conseyu d'Europa", qu'alertaba de la situación llingüística de Galicia en materia de normalización del gallegu.

Según recueye'l testu de la resolución d'Eblul, "les midíes adoptaes --pola Xunta-- contra la llingua gallega dende'l pasáu mes d'abril suponen un incumplimientu de trataos internacionales sobre derechos llingüísticos soscritos pol Estáu español, como'l Pactu Internacional de derechos civiles y políticos, o la Carta Europea de llingües rexonales minoritaries".
  
"Nun ye sólo que nun entamare nenguna de les midíes recomendaes pa dar cumplimientu de la Carta Europea, sinón que s'esmantelaron dalgunos de los proyectos más aplaudíos pol Conseyu d'Europa", aseguró.
  
Ente ellos mecionó'l casu de les Galescoles, la "única" rede d'enseñanza infantil que contemplaba "con normlaidá" l'usu del gallegu en cantares y xuegos.
  
Poro, el Comité acordó "por unanimidá" dirixise a la Xutna de Galicia pa reclamar que "ponga fin" a la so política de "desproteición de los derechos de la comunidá llingüística gallega" y "d'incumplimientu de los trataos intenacionales" competentes.