Convócase'l xuiciu contra Egunkaria seis años depués del pieslle

La sección primera de la sala de lo penal de l’Audiencia española fixó pal 15 y 16 d’avientu’l xuiciu contra cinco periodistes del diariu vascu “Egunkaria” procesaos por pertenencia o collaboración con banda armada. El xuiciu convócase seis años depués de que’l xuez instructor de l’Audiencia Nacional, Juan del Olmo, ordenara’l pieslle temporal y l’embargu preventivu de los sos bienes por, presuntamente, formar parte del conglomeráu empresarial controláu por ETA.

La fiscalía y la defensa pidieran en xunu l’archivu definitivu de la causa porque entendía que nun había indicios pa mantener l’acusación, pero un mes depués la sala decidió siguir alantre.
 
Deberán dir a xuiciu Martxelo Otamendi, direutor del periódicu dende 1993, Iñaki Uria, ún de los fundadores del periódicu y conseyeru delegáu nel momentu del pieslle, Txema Auzmendi, xesuita y secretariu d’alministración, Joan Mari Torrealdai, miembru de la Euskaltzaindia y del conseyu d’alministración, y Xabier Oleaga, miembru de la esquierda independentista encausáu nel sumariu 18/98 que nun formaba parte de la plantía d’Egunkaria.
 
Pello Zubiria y Xavier Alegría, tamién procesaos na causa inicial, nun serán xulgaos. Zuribia, primer direutor del periódicu, porque’l xuez archivó la causa porque prescribió. Mientres qu’Alegría yá foi xulgáu nel macro-xuiciu 18/98, y nun pue ser procesáu dos veces pol mesmu fechu.
 
Egunkaria, únicu diariu en vascu, foi peslláu por Juan del Olmo en febreru de 2003 cola detención de nueve periodistes. Un pieslle y embargu que tenía carácter preventivu y temporal de seis meses. Pero hasta güei, el procesu siguió con prólogues de seis meses y con continuos recursos de la defensa que foron refugaos.