Once asociaciones presenten un manifiestu contra la "imposición" del catalán

Onde asociaciones d’Aragón, Valencia, Baleares y Cataluña axuntáronse nun manifiestu que presentaron ayeri en Madrid pa denunciar la “agresividá del nacionalismu catalán”. Asina, anuncien “acciones xudiciales y movilizaciones populares” pa impidir la “imposición de la llocura del nacionalismu dixebraor” sobre les “llingües propies de los territorios” y el castellán.  

Pa los firmantes del manifiestu, la unidá llingüística del catalán ye una mentira de los nacionalistes y si los gobiernos autonómicos “imponen el catalán” nestes comunidaes, ta cometiéndose un “xenocidiu llingüísticu del que serán responsables”, esclarien. Amás, tamién denuncien que se quier eliminar el castellán de Cataluña y piden que cualquier persona puea vivir plenamente en castellán en Cataluña y estudiar na so llingua materna.

Les asociaciones quieren combatir “dende la llegalidá” lo que califiquen como proyeutu anticonstitucional de Países Catalanes en cualesquiera de les cuatro comunidaes y asina defender “los drechos y llibertaes recoyíos na Constitución y los Estatutos”.
 
Les asociaciones firmantes son, de Cataluña, Convivència Cívica Catalana y l'Asociación Cultural Cervantina; d’Aragón, la Federación de Asociaciones Culturales del Aragón Oriental (FACAO) y la Plataforma Aragonesa No Hablamos Catalán. Dende Valencia, firmen Nou Valencianisme, Grup d'Acció Valencianista y el coleutivu Valencia Freedom. Pa finar, dende Baleares firmen Academia, Plataforma de sa Llengo Baléà, Círculo Balear y Embajada Cultural de Baleares.