Torguen la entrada al Edificiu Históricu a un grupu d'alumnos y profesores que protestaben contra la fusión de facultaes

Los vixilantes del Edificiu Históricu de la Universidá impideron güei acceder al so interior a un grupu d'estudiantes y profesores, principalmente de les facultaes de Ciencies de la Educación y maxisteriu, que protestaben contra'l procesu de fusión de centros. Nel interior de la instalación, tenía llugar la celebración de la patrona universitaria, Santa Catalina.

A mediudía, un grupu d'estudiantes  y profesores xuntáronse ante la entrada del edificiu, enseñando pancartes contra la fusión, qu'afecta principalmente a los campus de Llamaquique (Maxisteriu y Pedagoxía), Viesques (Peritos) y Milán (Humanidaes).

Trés vixilantes xuraos bloquiaron l'accesu y torgaron a los concentraos a acceder al interior del clausutru. Ún de los profesores qu'acudió a la protesta, Veremundo Rey, docente del Departamentu de Psicoloxía y de Pedagoxía, espresó ante los medios de comunicación la so indignación: "ye la primer vez que mos asocede esto na historia de la Universidá. Córtenmos l'accesu a un actu que ye nuestru. Tán ehí trés señores que tienen ordes de nun se sabe quién nin por qué, pa que nun pasemos al patiu de la nuesa Universidá".
  
Pela so parte, el voceru de los alumnos, que prefirió caltenese nel anonimatu y identificóse como un estudiante, esplicó que'l procesu "quieren facelu en seis díes cuando debería llevar dos años". "Debería aldericase nos distintos órganos de representación, debería ser más tresparente, más democráticu, va trayer munchos problemes a la organización de les facultaes, munchos estudios van perder la so visibilidá nestes fusiones, la coordinacion va ser mui difícil, teniendo en cuenta que van entrar en vixencia dafechu l'añu que vien les nueves titulaciones de graos y de máster". "Ye una reestructuración precipitada. Debe dir mui lento, muncho más despacio pa qu'esti cambiu, en llugar de dir en perxuiciu de la universidá, vaya nel so beneficiu", añadió.
  
Al so xuiciu, "falta tresparencia, y la información ye mui vaga y mui poco concreta". "Consta de cinco o seis fueyes sin nenguna concreción. Lo único que paez que-yos interesa ye fusionar y dempués ver qué pasa. Pensamos que nuna universidá eso nun debería facese".
  
Afirmó amás que "l'apoyu ye xeneral" nos campus mencionaos y tán implicaos alumnos y profesores por igual.