L'Estáu saca a subasta l'antiguu parador de Payares, en L.lena

La Delegación d'Economía y Facienda n'Asturies publica güei nel BOE una resolución pola que s'anuncia la subasta pública del inmueble antiguu parador de Payares, asitiáu en L.lena y propiedá de l'Alministración Xeneral del Estáu.

El tipu de la subasta, según la resolución consultada por Europa Press, queda fixáu en 771.700,61 euros. El plazu pa la receición de les ufiertes acabará a les 13.00 hores del día 19 de xineru del 2010.

Pela so parte, l'abertura de les ufiertes tendrá llugar el próximu día 27 de xineru na sala de xuntes de la Delegación Especial d'Economía y Facienda n'Asturies, asitiada na planta quinta de la cai Gil de Jaz númeru 10 d'Uviéu.
  
Les condiciones de subasta pública descríbense nel respectivu pliegu de condiciones particulares, que tán a disposición de los participantes, na Estaya de Patrimoniu del Estáu de la Delegación.
  
El parador de Payares abrió les sos puertes en 1953. En 1985 l'Estáu cedió l'inmueble a Asturies por un periodu de 20 años, qu'acabó nel 2005. Esi añu, el Gobiernu autonómicu renunció a continuar cola concesión, pasando a depender de Patrimoniu del Estáu. L'edificiu llevá peslláu dende'l 2004.