Una eurodiputada galesa lleva a la UE les consultes soberanistes catalanes

La eurodiputada nacionalista galesa Jill Evans, presidenta de l’Alianza Llibre Europea (ALE), entrugó güei na sesión plenaria del Parlamentu comunitariu si taba na axenda de la próxima xunta del Conseyu européu del 10 y 11 d’avientu, falar sobre les consultes independentistes que van celebrar 150 conceyos catalanes el 13 d’avientu.

Evans entrugó na Eurocámara sobre la posición del nuevu presidente européu, el flamencu Ven Rompuy, no que se refier a estes consultes. La eurodiputada dixo qu’Europa taba cambiando y qu’esperaba que’l nuevu presidente asina lo reconociera y diera respuesta. Jill Evans lo dixo delantre del presidente de la Comisión Europea, José Manuel Durão Barroso, pa que-ylo tresmitiera a la presidencia sueca de turnu de la UE.

Del mesmu mou, Evans defendió na Eurocámara’l drechu d’autodeterminación dientro de los Estaos miembros. La eurodiputada forma parte del grupu verde, que ta dientro de l’ALE, onde s’incluyen formaciones como ERC, BNG o Chunta Aragonesista.

La entruga de la galesa taba xenerada poles consultes sobre la soberanía de Cataluña que’l próximu 13 d’avientu van realizar unes 150 localidaes catalanes. Estos conceyos siguen lo entamao por Arenys de Munt, qu’abrió’l camín a estes consultes el 13 de setiembre, nun referéndum onde foi aprobada la independencia de Cataluña con una amplia mayoría, anque cuntó con una participación del 41,01%.