Navarra aprueba l'ampliación de la so zona llingüística mista cola inclusión de cuatro nuevos conceyos

La Comisión de Réxime Foral del Parlamentu de Navarra aprobó esta mañana'l dictame de la proposición de Llei Foral pa modificar la Llei del Vascuence, de manera que la zona mista amplíase a los conceyos d'Aranguren, Belascoain, Galar y Noain-Valle d'Elorz "siempre qu'asina lo acuerden previamente, por mayoría absoluta, los plenos municipales".

L'oxetu d'esta modificación foi frutu d'una enmienda 'in voce' acordada por PSN, CDV y IUN, y que contó col apoyu de Nafarroa Bai, non asina d'UPN, que se mostró a la escontra de modificar la Llei del Vascuence dao que, según espunxo'l voceru rexonalista, Carlos García Adanero, "nun existe'l consensu necesariu" pa ello.
 
Esta modificación nun dexó, en cualquier casu, satisfechos al restu de los grupos de la oposición na Cámara, dao que Nafarroa Bai apostó por que nun exista zonificación en Navarra y CDN y IUN porque s'incorporen tamién a Beriain, "únicu conceyu de la Comarca que queda fuera de la zona mista".

  
Según espunxo García Adanero, la modificación d'esta llei ye "innecesaria" y señaló que nun inclúi'l requisitu de contar con un "ampliu consensu". "UPN representa al 43 por cientu de los ciudadanos y la modificación d'una nueva llei d'estes característiques nun ye bono que nun cuente col aval d'esi 43 por cientu", espunxo.
  
El voceru de la coalición nacionalista, Maiorga Ramírez, manifestó que l'actual Llei del Vascuence "nun posibilita a los ciudadanos que puean exercer la llibertá", pa decidir sobre l'usu del eusquera. Nafarroa Bai presentó asina dos enmiendes al testu, dambes refugaes, una pa que se declararen llingües propies y oficiales de Navarra'l castellán y l'eusquera, y otra pa que, en casu de que l'anterior nun tuviere apoyu, s'incluyere na zona mista 37 conceyos más.
  
Entrugóse Ramírez qué mal se xeneraría ente los ciudadanos navarros si éstos puedieren decidir sobre l'eusquera, y consideró "triste dafechu" que se "quiera imponer la imposibilidá" de matricular a los neños en centros públicos n'eusquera en dalgunes zones de la Comunidá Foral.
  
Pela so parte, el socialista Samuel Caro defendió la "plena vixencia" de la Llei del Eusquera, que calificó de "bona". Mostróse favorable a realizar dalgún "reaxuste" na norma dempués de 23 años, como'l que güei s'aprobó, en función del estudiu sociollingüísticu elaboráu pol Gobiernu foral y "siempre que los conceyos confirmen que deseen tar na zona mista".
  
Dende CDN, José Andrés Burguete apostó por modificar la llei de forma "mui puntual" col oxetu de tratar de manera "homoxénea" a la Comarca de Pamplona. Defendió asina la inclusión de Beriain, qu'a lo último quedó fuera. "Esta modificación nun mos satisfaz dafechu por nun incluyir a Beriain y pesllar asina la Comarca como zona mista", espunxó.
  
El voceru d'IUN, Ion Erro, criticó l'actitú d'UPN ante esta modificación y recordó que la llei pue sufrir cambios, si asina lo acepta una mayoría absoluta, "nun se fala de consensu". "UPN, nun exerciciu de cinismu, pretende'l derechu de vetu, que nun se faiga dalgo sin el so consentimientu", censuró.
  
Erro, que defendió que'l desarrollu del eusquera en Navarra debióse a los ciudadanos y non a les instituciones, refugó de la mesma manera que nun zarre la Comarca de Pamplona como zona mista. Según dixo, afitar nesti momentu la oficialidá del eusquera en Navarra sería "impracticable" na actual "realidá social y institucional".