Los sindicatos d’enseñanza movilícense contra la Llei d’evaluación

|

Mañana, 26 de payares, a les seis de la tarde, la Xunta de Personal Docente de los sindicatos SUATEA, FE CCOO y CSIF, convoca al profesoráu contra la Llei d’evaluación y en defensa de la educación pública na Plaza d’España d’Uviéu. Ellí entamará una manifestación que llegara hasta la sede de Presidencia del Principáu.

 Los sindicatos refuguen los intentos del Gobiernu de “mantener les discriminaciones” ente’l profesoráu y d’afitar un modelu d’evaluación “desconocíu y punitivu”. Según señalen, d’aprobase la nueva llei pondríase en marcha un sistema perxudicial pal conxuntu del profesoráu y pa la enseñanza pública asturiana.
 
Esclarien que’l proyeutu de llei de la nueva normativa cuenta cola refuga de la mayoría sindical del profesoráu asturianu y que con ella pretenden facer al parllamentu cómpliz d’una discriminación inaceptable qu’afeuta a munchos profesores a los que, en munchos casos, los tribunales-yos tán dando la razón.
 
Pa los sindicatos, mientres n’otres comunidaes autónomes tán avanzando haza la meyora de la calidá de la enseñanza y les condiciones llaborales del profesoráu, n’Asturies el Gobiernu intenta xebrar al profesoráu, atacando a dellos coleutivos, “agora con esta llei y antes col problema de los maestros na ESO, equipos d’orientación o reducción de plantíes”.

Contador Estadistiques