Los partíos aragoneses presenten 258 enmiendes a la Llei de Llingües

|

La Mesa de la Comisión d’Educación, Cultura y Deporte de les Cortes d’Aragón recibió 258 enmiendes de los grupos parlamentarios a la Proposición de Llei d’Usu, Protección y Promoción de les Llingües Propies d’Aragón, una propuesta del PSOE que quier reconocer “la pluralidá llingüística d’Aragón y garantizar el so usu”. De les 258 enmiendes, 11 foron presentaes por Chunta Aragonesista, 60 pol PP, una por cada artículu de la llei, 48 pol Partido Aragonés y 39 por IU.

El diputáu del grupu popular, Miguel Navarro, yá anunció la refuga del so partíu a que l’aragonés y el catalán seyan emplegaos como llingües vehiculares de la enseñanza non universitaria, yá que’l PP defende “la enseñanza de les modalidaes llingüístiques, pero en nengún casu promoverán l’enseñu del aragonés y el catalán”. Del mesmu mou, Miguel Navarro esclarió que’l so partíu nun ta d’alcuerdu con reconocer los drechos de los falantes d’aragonés y catalán énte l’Alministración, yá que “xeneraría un gastu innecesariu en traducciones que la CCAA tendría que soportar”.
 
El mesmu PP ta d’alcuerdu col Partido Aragonesista (PAR) en refugar la denominación de catalán pa lo que se fala na Franxa de Poniente y quieren nomalo “aragonés oriental”, según el PAR o “modalidá llingüística local falada n’Aragón oriental”, que ye’l nome que propón el PP.

La Llei de Llingües dixebra a los socios de gobiernu, PSOE y PAR, yá que los socialistes quieren protexer l’aragonés y el catalán como “llingües propies ya históriques de la comunidá”. Anque nun quieren la oficialidá, si defenden el so enseñu y el so usu coles alministraciones nos territorios onde se fala. Per otru llau, IU y Chunta Aragonesista quieren que les dos llingües seyan oficiales.

La proposición de Llei de Llingües foi rexistrada nes Cortes d’Aragón el pasáu mes de xunetu y tien 27 artículos dixebraos en siete capítulos, amás de cinco disposiciones adicionales, una transitoria, dos finales y una derogatoria. Una vegada aprobada, la norma convertiráse nel marcu llegal sobre’l que xire la política llingüística n’Aragón.

Contador Estadistiques