La Coordinadora Ecoloxista d’Asturies presenta alegaciones contra una nueva balsa de llodos en Salas

La Coordinadora Ecoloxista d’Asturies vien de presentar alegaciones contra’l proyeutu de Sílices la Cuesta S.L. de crear una nueva balsa de llodos con una ocupación de 15.000 m2 nes canteres de la Cuesta en Salas. Pa la CEA'l proyeutu contradiz la llegalidá al nun restaurar la cantera y non reciclar los vertíos industriales, amás de poner en peligru’l camín de Santiago.

Los ecoloxistes recuerden que col actual marcu llegal tres usar una cantera, esta tien que ser restaurada pa volver a usar el terrén pa los sos usos habituales, pero’l proyeutu presentáu convertiríala nuna nueva balsa de llodos. Amás de que na autorización ambiental de 1996 nun se contempla esa balsa y cualquier camudamientu tien que volver a ser estudiáu nuevamente pola alministración.
 
El proyeutu de Sílices la Cuesta contradiz tamién directives europees al nun contemplar el reciclaxe, reutilización o valorización de los residuos industriales. Del mesmu mou, señalen que pela esplotación que quieren enllenar de llodos pasa’l Camín de Santiago, declaráu conxuntu histórico-artísticu pol Estáu y protexíu pola alministración autonómica. Los ecoloxistes recuerden que Salas ye’l conceyu col mayor númberu de canteres d’Asturies, 12 en total.