El PP refuga la TVG en Castiella y Lleón

El Grupu Popular de les Cortes de Castiella y Lleón refugó una proposición non de llei sobre la continuidá de la emisión de la TVG en Senabria y El Bierzu al traviés de la TDT. La propuesta foi defendida pol procurador socialista Pedro Nieto na Comisión de Tresportes ya Infraestructures de les Cortes castellano-lleoneses, pero tres el non del PP la TVG nun se podrá ver en Lleón y Zamora tres l’apagón analóxicu de 2010

Pa poder ver una canal autonómica fuera de les llendes alministratives d’una comunidá, los dos gobiernos tendríen que roblar un alcuerdu, posibilidá que queda bloquiada nel casu lleonés tres la negativa del PP a aprobar la propuesta. Fai díes, Alberto Núñez Feijóo, presidente popular de la Xunta de Galicia, afitaba que la emisión de TVG llegara a zones d’Asturies, Lleón y Zamora yá que la canal pública gallega tien ente los sos principales funciones “la promoción y defensa de la cultura y l’idioma gallegu”.