El CAO presenta la semeya 10.000

La protagonista de la semeya 10.000 de la campaña “Yo doi la cara pola oficialidá” del CAO ye Raquel Braga Corral, militante de la Xunta pola Defensa de la Llingua na Cuenca del Nalón y encargada de xubir les primeres 5.000 semeyes a la galeria de flickr. Asina lo anunciaben güei na Casa de Cultura de La Pola Siero los integrantes de la organización na localidá y Poli Mencía, coordinador de la iniciativa.

Con esti simbólicu actu quieren face-y un pequeño homenaxe pol so trabayu nos primeros meses de la campaña. Del mesmu mou, Poli Mencía recordó los actos del próximu sábadu 28 en La Pola Siero, onde’l CAO quier festexar les 10.000 semeyes. Una celebración conmemorativa de la sociedá asturiana que se moviliza, pero tamién reivindicativa esixendo que’l Gobiernu asturianu recueya nel Estatutu la oficialidá del asturianu y del gallego-asturianu nel so ámbitu, señalaron.
 
La xornada contará con una partida de bolos na que participarán el ciclista Chechu Rubiera y l'ex futbolista del Sporting Cundi. Amás de xuegos tradicionales pa los neños, cuntacuentos, un amagüestu, amueses d’usu d’Ubuntu n’asturianu o música de la mano d’Herbamora, Toli Morilla o Anabel Santiago, ente otros. Unos actos nos que la organización quier aprovechar pa facer la imaxe que sumará la 10.001, que va tar protagonizada por Valentín Loredo, históricu militante de la reivindicación llingüística, miembru del grupu de montaña Picu Fariu y CCOO de Siero.
 
Pal responsable de la campaña, Poli Mencía, la iniciativa nun tien un final definíu, yá que va siguir hasta que s’algame’l fin últimu de la oficialidá, “y siguirá depués con un `Doi la cara pola normalización´ si ye necesario”, señaló a Asturies.com. Poli Mencía tamién aprovechó pa denunciar que depués de tres meses de l’aprobación del espediente toponímicu de Siero, el Conceyu sigue usando nes sos comunicaciones cola ciudadanía la toponimia deturpada en castellán.