Armenia amenaza con reconocer la independencia de Nagorno Karabaj si tropes d'Azerbayán ocupen la rexón

Armenia alvirtió esti llunes que pue reconocer la independencia de la rexón separatista azerí de Nagorno Karabaj si Azerbaiyán cumple coles sos amenaces d'entamar una aición militar pa recuperar el control d'esta zona. "Si les negociaciones de paz se ruempen y entama una aición militar, nun hai nada que s'interponga nel camín d'Armenia pa reconocer la independenica de Nagorno Karabj", dixo Samvel Farmanyan, el voceru del presidente armeniu, Serzh Sarkasyan.

Esti sábadu, el presidente d'Azerbaiyán, Ilham Aliyev, declaró que la paciencia del so gobiernu ta acabándose y que si nun se produz pronto un avance nes negociaciones ordenará a les tropes entrar en Nagorno Karabaj.
  
El conflictu d'esti llugar --con una población mayoritariamente d'etnia armenia-- entamó col esmenbramientu de la Unión Soviética en 1991. Enantes del altu'l fueu de 1994 yá morrieren 30.000 persones y más d'un millón fuxeren de les sos cases. Les tropes armenies ocupen dende entós esti territoriu y siete distritos axacentes.
  
Dalgunos medios publicaron que, a cambiu de reestablecer les rellaciones ente Armenia y Turquía, Ereván podía replegar a les tropes que caltién nos distritos cercanos a Nagorno Karabaj, pero Farmayan declaró que "esta cuestión nun se ta discutiendo".
  
Ayeri, Sarksyan y Aliyev caltuvieron el so sestu alcuentru billateral d'esti añu. Mediadores d'Estaos Uníos, Francia y Rusia revelaron que demientres el conceyu ficiéronse "importantes progresos", pero matizaron que tovía hai ciertes diferencies ente dambos.
  
Éstos adelantaron que siguirán trabayando colos ministros d'Asuntos Esteriores armeniu y azerí enantes del Conseyu Ministerial de la Organización pa la Seguridá y la Cooperación n'Europa (Osce) del 1 y el 2 d'avinetu n'Atenes.