Silvino Antuña recibe'l premiu de folclor Martínez Torner d'Uviéu pola so "comprensión de la canción popular asturiana"

El Conceyu d'Uviéu y la Escuela de Música Tradicional 'Manolo Quirós' entregarán mañana nel auditoriu Príncipe Felipe d'Uviéu'l Premiu Nacional de Folclor Martínez Torner del 2009 a Silvino Antuña Suárez (Silvino 'el sastres') por "toa una vida dedicada al entendimientu y comprensión de la canción popular asturiana".

Asina lo apuntó l'Ayuntamientu d'Uviéu nuna nota prensa na que, amás, asegura que "se trata d'una de les persones que mayor conocencia tien sobre la historia de la tonada asturiana, tanto nel aspectu historiográficu, nel apartáu de cantantes, como nel de la técnica o'l del estilu qu'acueyen esti xéneru de la canción".
 
De l'aportación del premiáu a la canción asturiana destaca'l "so llabor de recopilación discográfica, documental y didáctica", que lu tornaron nel poseedor de "una de les mayores y meyores colecciones" de discos tradicionales asturianos.
  
De la so faceta como docente, qu'entama nos años 50 en Sotrondio como director de l'Academia de la Canción Asturiana, destaca'l so métodu nel que los alumnos debíen cantar nel chigre, "la meyor escuela pa él porque escenificaba la pureza de la tonada conservando les enseñances de los más vieyos".
  
L'actu, que tendrá llugar a les 19.30 hores, contará cola actuación del profesoráu de la Escuela de Música Tradicional 'Manolo Quirós'.