L’Asociación de Trabayadores de la Normalización Llingüística pon la oficialidá como exemplu pa salir de la crisis

Dende l’Asociación de Trabayadores de la Normalización Llingüística (ATNLL) camienten que n’Asturies nun s’escomencipió a sacar tol rendimientu potencial a la llingua yá que “mientres les comunidaes con llingua oficial reciben grandes tresferencies económiques del Estáu”, nel nuesu país al nun haber oficialidá “el gobiernu asturianu dexa de recibir una montonera de perres”. Colo cual dende l’ATNLL señalen que la oficialidá, amás d’una cuestión de drechos, podría ser rentable.

Pa l’asociación el fomentu del idioma nun ye un lluxu, “ye un drechu fundamental”, y la so normalización valdría pa saca-y rindimientu políticu, social, cultural, pero tamién económicu “como promoción esterior, atracción turística o producción cultural”. Dende ATNLL esclarien que nestos tiempos de crisis ye hora d’apostar polos valores y potenciales propios.
 
Del mesmu mou, los trabayadores de la normalización señalen que na negociación del presupuestu añal nun ye malo racionalizar gastos, pero los servicios a la ciudadania nun se tienen que resentir un res. Esclarien que les actividaes productives son un valor añadíu que xénera emplegu y pon en valor recursos propios, que nun son prescindibles y son d’ayuda p’afrontar problemes n’otros sectores.