El Conseyu de la Mocedá d’Uviéu posicionase contra les ordenances cíviques

El Conseyu de la Mocedá d’Uviéu, tres una iniciativa de Fai!, vien d’aprobar una propuesta de resolución sobre la "Ordenanza Cívica de Convivencia Ciudadana". Nella, esplícitase que van pidir una entrevista cola Conceyala de Seguridá Ciudadana d’Uviéu, Concepción García Álvarez, na que-y van treslladar les postures del Conseyu sobre la norma. El CMU, según anuncia Fai! al traviés d’un comunicáu, comprometióse a facer un actu artístico-reivindicativu nel que se va pintar la fachada del Conseyu p’amosar la so refuta “a la metodoloxía de les multes y les porres que Gabino quier pa Uviéu”.

Del mesmu mou, Fai! va cellebrar esti viernes 27 en La Calleja la Ciega (Cai Martínez Vixil, 14) un conciertu contra la ordenanza cívica d’Uviéu. El conciertu entamará a les 19.00 hores coles actuaciones del grupu de hardcore de L.lena Adizión Etílika y de los grupu de punk xixones Vinagre de Sidra, amás d’otru grupu invitáu. La entrada será de 3 euros y nel mesmu esplicaráse en que consiste la ordenanza.
 
Según la organización de mocedá, la nueva ordenanza de seguridá “reprimirá al traviés de multes d'hasta 3.000€ la llibertá d'espresión nes cais d'Uviéu, acosará la mendicidá y a los "ensin papeles" y torgará les formes alternatives d'ociu mozu na capital d'Asturies”.