UPyD quier eliminar de la Constitución la protección y el respetu pola pluralidá llingüística

Unión Progreso y Democracia (UPyD) quier que la Constitución española nun reconoza la protección y respetu a la pluralidá llingüística del Estáu, amás d’incluyir la llingua como elementu de non discriminación, equiparable al racismu. Asina lo aprobó nel so I Congresu, onde s’afitaron les llinies maestres de la so estratexa política y onde Rosa Díez foi reelixida como dirixente del partíu col 81% de los votos.

La organización escoyó nun definise nin d’esquierdes nin de dreches, anque na ponencia de Política Xeneral recuéyese que la nación española ye la única d’UPyD. El partíu niega, amás, el reconocimientu d’otres realidaes y sensibilidaes llingüístiques y nacionales que nun seyan la española, “renunciando a representar o promover entidaes de tipu territorial, románticu o mitolóxicu”, esclarien.

No que cinca a la política territorial, UPyD defínese como un partíu que quier una España federal “d’intensidá media y cooperativu” con competencia esclusiva pa “toes aquelles materies lligaes íntimamente a los entamos estructurales del sistema constitucional”. Per otru llau, quieren l'anulación del Cupu vascu, del réxime fiscal de Canaries, de los “privilexos nacionalistes” de Cataluña y del réxime foral navarru.