La Tarrancha ta a piques d’asoleyar el so primer discu; “Ö-3-3”

Ö-3-3 (Otres trés) va ser el nome de primer discu de llarga duración del grupu de ska-reggae La Tarrancha. Editáu por Algamar Producciones y grabáu nos Estudios Tutu por Sergio Rodriguez, cuenten sacalu a la cai a entamos d’avientu. Según el grupu va ser un discu eclépticu formáu por doce temes onde la banda amuese’l so peculiar y personal estilu. Pel momentu la banda ufre los temes “A la lluna” y “La Nueche que t’alcontré” nel so MySpace como adelantu del discu.

Con Ö-3-3 la banda sigue colos sos títulos cliptográficos nos discos, el single “Exist-encia” y la maqueta “QLT” (Culete), y la so mecigaya de soníos, dende’l ska al funk, pasando pol folk o’l reggae. La banda va recoyer nel nome del discu la perconocida frase yá popularizada en cualesquier conciertu n’Asturies que “glayase tanto nun conciertu de Dixebra, como nun de la Pantoja”, señala’l grupu. Col títulu la banda quier afalar al públicu pa que-yos glaye nos directos el míticu “otres trés”.
 
La Tarrancha recuerda como la primer vez que se glayó “Otres trés” foi nun conciertu n’Euskadi, va pa más de diez años, cuando ún de los futuros integrantes del grupu vio como al finar el conciertu la xente glayaba “beste bat” (otra más), entós el empecipió en tonu de chancia un xuegu de pallabres que los vascos nun pillaben, yera la primer vez que s’usó, el yá popular, “otres trés, otres trés”.