Ecoloxistes n’Aición denuncia los altos índices de mercuriu n’Asturies

Ecoloxistes n’Aición d’Asturies vien de denunciar l’apaición de niveles altos de mercuriu nos regatos d’El Muselín y La Piquera, na parroquia xixonesa de Xove. Con estos datos, los ecoloxistes aprovechen pa denunciar les emisiones a l’atmósfera d’esti metal pesáu xeneráu polos centrales térmiques de carbón, “que son la fonte más importante de contaminación por mercuriu y que los gobiernos nun regulen”, esclarien. Según los sos propios estudios, en 1998 n’Asturies emitiéronse más de 300 kg de mercuriu a l’atmósfera.

Esti metal pue ser tresportáu a grandes distancies depués de ser llanzáu a l'atmósfera, pero la deposición atmosférica ye más alta nes fasteres próximes a la emisión “y tovía más onde son mayores les lluvies, como n’Asturies”. Mientres que nel Estáu hai unos valores de mercuriu nel suelu d’ente 10 y 20 gramos por km cuadráu al añu, nel sureste d’Asturies y nel norte de Lleón esos valores algamen los 50 y 100 gramos añales, espliquen los ecoloxistes.
 
Al traviés d’un comunicáu la organización quier dar a conocer los problemes del mercuriu y los sos derivaos, “pertóxicos n’especial pal sistema nerviosu infantil en desarrollu”. Amás, señalen, que tamién son dañinos pal ecosistema y falen de como esti metal pue acumulase n’organismos de la cadena alimentaria, sobremanera l’acuática. Asina, pexes como l’atún o’l pexe espada, que depués van ser consumíos poles persones, avezan tener altes cantidaes de mercuriu “que trespasen la barrera placentaria y sanguínia del cerebru, faciéndolos especialmente peligros pa les muyeres embarazaes que puen trespasa-ylo a los sos fíos”, afiten.