La Policía marroquina carga contra una manifestación saharaui que pidía la vuelta d'Aminetu Haidar en Dajla

La policía marroquina cargó contra una manifestación que se produxo na ciudá de Dajla, Sahara Occidental, a última hora de la tarde del miércoles pa condenar la represión marroquina contra los civiles saharauis; exixir el retornu darréu de l'activista de Derechos Humanos retenida nel aeropuertu de Lanzarote, Aminetu Haidar, la lliberación de los siete activistes deteníos el pasáu 8 d'ochobre nel aeropuertu de Casablanca cuando tornaben de visitar a les sos families nos campamentos de Tinduf, y de tolos presos políticos saharauis nes cárceles marroquines, según informó güei nun comunicáu'l Serviciu de Comunicación de la Delegación Saharaui en Canaries (SCSC).

En términos asemeyaos manifestábase ayeri la Comunidá Saharaui en Mauritania, país nel que residen más de 15.000 saharauis. "Condenamos enérxicamente'l vil secuestru y espulsión de la so patria de la gran defensora de los Derechos Humanos saharauis Aminetu Haidar", manifestaron nun comunicáu oficial remitíu al SCSC. Pal colectivu, trátase de "una conspiración sucia y clara", desarrollada "conxuntamente pol Gobiernu marroquín y l'español", que "obligó a entrar a Haidar nel so territoriu a la escontra la so voluntá". Poro, exixieron a les Naciones Uníes "una intervención urxente sobre esta cuestión y la torna darréu de l'activista de Derechos Humanos al Sahara Occidental".
 
La Comunidá Saharaui en Mauritania estima amás que, tres el discursu pronunciáu por Mohamed VI a primeros d'esti mes con motivu del aniversariu de la Marcha Verde, "quedó claro que les maniobres del Gobiernu de Marruecos y el so rei tán, una vez más, condenaes al fracasu ante la llucha feroz que llibre'l nuesu pueblu nes zones ocuapaes del Sahara". "Foi'l propiu rei'l que dio personal y públicamente les ordes pa que s'execute esta nueva campaña de xabaz represión que consiste en reprimir, asesinar, raptar, encarcelar y deportar a los saharauis de los territorios qu'ocupa", alvierten nel so comuicáu.