El flamencu Van Rompuy ye’l primer presidente de la Unión Europea

El demócrata-cristianu flamencu Herman Van Rompuy foi escoyíu polos 27 xefes de gobiernu de la Unión Europea como’l primer presidente comunitariu, un cargu que surde del Tratáu de Lisboa. Van Rompuy dixo tar agradecíu y afitó qu’asume la so responsabilidá “con convicción y entusiasmu”. Per otru llau, la británica Catherine Ashton foi escoyida como la primer muyer representante de política esterior y seguridá común de la Unión. P’algamar l’alcuerdu’l gobiernu británicu tuvo que renunciar a la so candidatura de Tony Blair como presidente européu y proponer a Ashton como representante d’Europa nel mundu.

El nome del conservador flamencu yera’l propuesto por Francia y Alemaña y foi’l candidatu del consensu. El primer presidente de la historia de la Unión, un cargu que nun desaniciará les presidencies semetrales, tará nel so cargu dos años y mediu y será la cabeza visible de la organización continental. Sicasí, la so importancia real tovía ta ensin definir. Van Rompuy tomará posesión como'l primer presidente estable de la UE l’ún de xineru de 2010, cuando la presidencia rotatoria de la UE correspuenda al Estáu español.

El flamencu Herman Van Rompuy, que tien un blogue en neerlandés y en catalán con torna automática, ye anguaño’l primer ministru belga. Militante del partíu democristianu flamencu (CD&V), foi presidente del Parlamentu belga y ministru de Presupuestos. Deconocíu fuera del so Estáu, foi quién a aselar la confrontación ente flamencos y francófonos tres asumir el poder depués de 18 meses de grave crisis política. Nació en Bruseles fai 62 años, foi educáu por xesuites y ye llicenciáu en Filosofía y Económiques na Universidá Católica de Lovaina. Ye católicu y defende una Europa cristiana na que nun entraría Turquía.

Per otru llau, la llaborista británica Catherine Ashton ye la primer muyer encargada de la diplomacia europea. Foi escoyida tres que’l Gobiernu británicu renunciara a la candidatura de Tony Blair como presidente comunitariu y propunxera a Ashton como ministra europea. Con 58 años esta llicenciada n’Economiques nun tien cuasi esperiencia en política esterior. Foi presidenta de la Cámara de los Lores mientres la robla del Tratáu de Lisboa y tuvo responsabilidaes en drechos humanos, cuestiones sociales ya igualdá nel ministeriu británicu d’Educación y Xusticia. Hasta 2008 yera Comisaria europea de Comerciu.