El Bloque pide al Arzobispu qu’impida una misa pol cabu d’añu de Franco

El Bloque por Asturies quier que l’Obispu Auxiliar d’Uviéu, Raúl Berzosa, nun permita la celebración d’una misa pol cabu d'añu del dictador Francisco Franco, que tolos años pol 20 de payares tien llugar na avilesina ilesia de San Nicolás de Bari. Pal Bloque ye “un insultu y una provocación facer una misa n’honor del responsable de la muerte de miles d’asturianos que llucharon pola llibertá y la dignidá de les persones”.

Al traviés d’un comunicáu la formación esclarió que l’apoloxía del fascismu nun tien que ver cola llibertá d’espresión, “pues supón en sí la negación del mesmo”. Del mesmu mou, pidieron la collaboración de les autoridaes eclesiástiques pa que nun haya que llamentar incidentes “de los que namás son responsables les actitues prepotentes y provocadores d’una parte de la élite eclesiástica”.
 
Pal Bloque ye contradictoria l’actual actitú de la ilesia “qu’amenaza cola excomunión ya intenta intervenir na vida política, niega-y drechos a muyeres en cuestiones como l'albuertu, mientres nun tien reparu nengún en dar misa n’honor d’asesinos”. Amás, reseñaron que mientres la ilesia recibe “subvenciones millonaries que vienen de los impuestos de los ciudadanos”, estos nun respeten la llei al mantener símbolos franquistes “como’l qu’hai na ilesia de San Nicolás de Bari, ente otres munches d’Asturies”.