La Pola Siero va acoyer la celebración poles 10.000 semeyes de "Doi la cara"

La celebración del Conceyu Abiertu pola Oficialidá (CAO) del llogru de les 10.000 semeyes na campaña 'Doi la cara pola oficialidá' en La Pola Siero, el próximu 28 de payares, axunta un amagüestu musical, xuegos tradicionales, cuentacuentos, un alcuentru de pandereteres y una sesión d'instalación de la versión n'asturianu del software llibre Ubuntu, a cargu de l'asociación Softastur.

   Asina lo informó'l CAO al traviés d'una rueda de prensa, na que s'anunció'l programa d'actividaes d'esti actu conmemorativu.

   L'Amagüestu col qu'acabará la xornada será nel Antiguu Bancu Central, de magar les 21.00 hores. Amás de sidra y castañes pa degustar, contaráse coles actuaciones de Toli Morilla, Anabel Santiago, Duerna, Pandereteres de Fitoria y La Curuxa.

   El restu d'actos tendrán llugar na Plaza d'Abastos, de magar les 12.00 hores, momentu nel qu'entamará una partida bolos na que tomarán parte'l ciclista Chechu Rubiera, y l'ex futbolista del Sporting Cundi. Posteriormente tendrán llugar los xuegos tradicionales y el cuentacuentos, cola actuación del monologuista Milio'l del Nidu. A les 17.00 hores entamará la demostración de la instalación del sistema operativu de software llibre Ubuntu. A les 19.00 tendrá llugar l'alcuentru de pandereteres, cola participación de Nerbia, Herbamora, Fitoria, Melarde y Cantaruxare, que protagonizarán un pasucais, cola presencia de los Sidros de Valdesoto.