Pablo Antón Marín Estrada ye'l ganador del Premiu "Xosefa Xovellanos"

Pablo Antón Marín Estrada resultó ganador de la trixésima edición del Premiu de novela en llingua asturiana "Xosefa Xovellanos" que concede la Conseyería de Cultura. El xuráu que concedió esti galardón aconceyó na sede de la Conseyería de Cultura y Turismu baxo la presidencia de la Directora Xeneral de Política Llingüística, Consuelo Vega Díaz, y cola participación de los escritores Miguel Barrero, Miguel Rojo y Taresa Lorences. Otres siete noveles presentáronse al premiu, dotáu con 7000 euros.

Ente les obres presentaes, el xuráu decidió conceder el Premiu al testu tituláu "Mientres cai la nueche", al valorar que se trata d'una novela "que s'acerca a los acontecimientos históricos de la posguerra, centrándose nos socedíos de los fugaos que s'echaron al monte pa lluchar contra'l franquismu; y que pa detrás amuesa una combinación acertada de rigor documental y bona construcción narrativa, non ensin dellos matices poéticos". La decisión del Xuráu adoptóse por unanimidá y tres d'un debate final onde se valoró de manera especial el testu "La empresa, yo y casame", que resultó finalista del certame.

Pablo Antón Marín Estrada nació en Sama (Llangréu) nel 1966, anque dende finales de la década de los ochenta vive en Xixón. Militó en Conceyu Bable y co-organizó la "Feria del Llibru y del Discu n'Asturianu" de Xixón. Nel 1989 publica'l so primer llibru de poesía, "Blues del Llaberintu", premiáu pola Academia de la Llingua Asturiana. De magar entós publicó una ventena de títulos de xéneru diverso, ente los que destaquen el volume de relatos "Esa lluz que naide nun mata" (1995) y el diariu "Agua que pasa" (1995).

Nel 1997 llogra ex aequo el Premiu de novela "Xosefa Xovellanos" cola obra "La ciudá encarnada", una historia ambientada nel franquismu y que describe en clave de novela policíaca les convulsiones polítiques y sociales que vive una ciudá asturiana por mor del asesinatu brutal d'un homosexual, y que yá va pola segunda edición. Cola segunda novela, "Los caminos ensin fin" (2000) convirtióse nel primer autor n'asturianu reconocíu con un premiu de carácter estatal, l'"Abril" de lliteratura xuvenil.

D'ente los sos últimos títulos publicaos destaquen los poemarios "Los baños del Tevere" (2003) y "Animal estrañu" (2008), entrambos los dos Premiu "Xuan María Acebal", y la novela "La boca puerca", premiu "Narraciones Trabe" 2007.