La Fundación Caveda y Nava va celebrar la so Xornada anual con Vicente Gotor como nuevu patronu

La Fundación Caveda y Nava va celebrar la so sétima Xornada anual el próximu 28 de payares nel conceyu de Villaviciosa cola novedá del nomamientu de Vicente Gotor, Rector de la Universidá d'Uviéu, como Patronu d’Honor de la Fundación. Un nomamientu que se xunta al d'otros patronos d’Honor anteriores como Javier Uría Maqua, Enrique Castro “Quini”, Hugo Morán, Pilar Fernández Pardo, Gabino Diaz Merchán, Carmen Ruiz-Tilve, Emilio Marcos Vallaure o Paloma Uría.

Dende la Fundación Caveda y Nava entienden que "so contribución pa desbloquear la incorporación de los estudios d'asturianu al nuevu plan de Bolonia identifícase muncho col espíritu de consensu d'esta fundación". Según los organizadores, "con independencia de la fórmula resultante, un “minor”, lo cierto ye que la xestión del equipo rectoral ufrió una salida a dalgo qu'amenazaba ser una fonte de conflictos permanentes sobre'l nuesu idioma".

Les palabres d'acoyida va pronunciales José Suárez Arias-Cachero, na so doble condición de Conceyal de Cultura d'Uviéu y Patronu de la Fundación.

La Fundación va presentar un videu

Per otru llau na mesma xornada va proyectase "en videu dalgunos de los testimonios grabaos n'ediciones anteriores ente los miembros del patronato", y tamién "una pieza de promoción, percuidada formalmente, na qu'amosamos los nuesos argumentos yá conocíos y la nuesa propuesta de redacción del artículu cuartu del Estatutu d'Autonomía".

Toos estos actos emprincipiarán el sábadu 28 de payares a les doce de la mañana frente a la casa natal de Caveda y, como novedá, continuarán na sé de la Fundación José Cardín, na cai Eloisa Fernández, númberu 2, de Villaviciosa.