Unidá Nacionalista Asturiana presenta un recursu contra la térmica de Corvera

Unidá Nacionalista Asturiana ta acabante de presentar un recursu contra'l proyectu d'instalación d'una térmica nel conceyu de Corvera. Pa esta formación "ye discriminatorio qu'esta mena d'instalaciones se refugaren por motivos ambientales n'otres partes del estáu con un aire menos contaminao que lo de Corvera".

Según Tino Fernández, portavoz medioambiental d'UNA "nun s'argumentó razón nenguna pa declarar la estructura d'utilidá pública, lo que dexa n'evidente indefensión a los que nos camentamos que nun habría tener esta declaración, darréu que nun podemos discutir los motivos d'esta". Asimesmo afita que “declárase d'utilidá pública una térmica, pero inda nun sabemos pa qué ye útil, sacante pa los porgüeyos de dalguna empresa privada”

Dende UNA recuerden que "en delles ocasiones nel estáu nun se permitió a instalaciones d'esta clas afincase en zones con una calidá del aire que yera bastante meyor qu'en Corvera, asemeya lóxico entrugase ¿Por qué nuna de les zones con más contaminación atmosférico de toa Europa, sí se permite?", y recuerden "qu'Asturies ye una de les zones con menor prioridá pa poner instalaciones de producción d'enerxía, pese a esto y a la polución, declárase d'utilidá pública".

Finalmente Fernández conseña que “nun pue haber ciudadanos de primera y ciudadanos de segunda, les lleis han protexer los ciudadanos por igual, pero equí PSOE-IU papen tolo que se-yos mande en Madrid ensin pensar si va ser bono o malo p'Asturies”.