La directora xeneral de Política Llingüística de la Conseyería de Cultura del Gobiernu asturianu, Consuelo Vega, calcó na "mui fuerte política" de promoción del asturianu que, según comentó, l'Executivu autonómicu vien desarrollando nes últimes décades. Dende'l so puntu de vista, esti llabor nótase nuna mayor presencia de la llingua na vida social y cultural, y nos medios de comunicación.

   Espresóse asina antes d'entamar na Facultá de Bioloxía de la Universidá d'Uviéu l'actu de presentación del ensayu '¿Ónde tamos dempués de venti años de xenoma humanu?', del biólogu molecular Xosé María Fernández. La cita ta enmarcada dientro de la segunda xornada del Día de les Ciencies Asturianes que desarrolla la Conseyería de Cultura.

   Entrugada polos periodistes sobre delles crítiques pola supuesta falta de promoción o apoyu a la llingua, Vega dio la so versión: "tamos faciendo nes últimes décades y nes últimes llexislatures una promoción mui fuerte de la llinga asturiana, del so usu social y del so espardimientu". Según la directora xeneral, "ye una iniciativa que tamos apoyando dende'l Gobiernu, tentando dar voz a les aspiraciones d'un conxuntu ampliu de la sociedá".

   Asina, dende'l so puntu de vista esta política "ta traduciéndose nuna recuperación del usu del asturianu, nuna presencia mayor nos medios de comunicación, nos campos de la vida social y cultural", amás de dir "conquistando añu a añu otros campos onde teníamos menos esperiencia, como ye'l campu científicu", en referencia al carácter científicu del actu que la ocupaba güei.