La SGAE pide al Conceyu de Cabranes 7.500 euros
|
9 Payares, 2009 por E.P. / Redacción
- Inicie sesión o rexístrese pa espublizar comentarios
La Sociedá Xeneral d'Autores llevará a xuiciu esti mes al Conceyu de Cabranes, al que reclama 7.499,30 euros en conceutu de derechos d'autor por una serie d'actuaciones musicales celebraes nesti conceyu ente los años 2002 y 2008. La demanda afecta en primer llugar a les orquestes de les verbenes de les fiestes de San Francisco, y en segundu a actuaciones incluyíes na Axenda Cultural del Principáu d'Asturies, correspondiendo tamién una mínima parte a actuaciones tradicionales de bandes de gaites y grupos de folk.
Asina lo confirmaron a Europa Press fontes de la Sociedá, consultaes por esti xuiciu, que tendrá llugar el próximu 30 de payares nel xulgáu númberu 1 de lo Mercantil d'Uviéu.
La principal cifra, según esplicaron les mesmes fontes, refierse a les actuaciones de les orquestes nes verbenes de les fiestes, celebraes nel mes de mayu, demientres los años 2005, 2006, 2007 y 2008, poles que'l Conceyu nun abonare supuestamente los mencionaos derechos.
No referente a los conciertos qu'inclúi l'Axencia Cultural del Principáu, trátase d'actuaciones que la Conseyería de Cultura cede a diferentes conceyos. Según esplica la SGAE, el pagu de los derechos d'autores de les mesmes correspuenden al Ayuntamientu. Ente les mesmes, figuraría una actuación de Los Berrones, celebráu na capital cabraniega, Santolaya.
A lo último, figuren pasacais de bandes de gaites y grupos de baile tradicional, "actividaes que tamién tán suxetes a derechos d'autor", esplicó la mesma fonte. Sicasí, la SGAE precisa qu'esti conceutu sólo suma 94 euros del total de la reclamación, y poro "nun ye trescendente nel casu de Cabranes".
Polo menos ún de los testigos que comparecerán nel xuiciu, pela parte municipal, será'l director de la Banda Gaites Villaviciosa-El Gaitero, formación que yá actuó delles veces n'actos públicos cabraniegos.
Fontes de la Sociedá reconocen que "s'abrió un alderique sobre si los eventos de corte tradicioanl, como l'actuación de bandes de gaites, deberíen pagar derechos d'autor", y la postura de la SGAE ye que sí, "porque la música qu'interpreten, anqe tenga un orixe tradicional, arregláronla dempués autores que rexistraron los sos arreglos y que mos confiaron la so xestión".
"Ye mui diferente qu'un gaiteru toque una melodía d'una tonada tradicional, a qu'esa melodía lleve una orquestación interpretada por otros músicos", matizaron diches fontes.
Efrén d'Andrés
Comentarios
Vaya cara más dura los de la Sgae.
Si vas en coche con unos amigos escuchando un CD y xubes a deu a ún de la SGAE, ¿qué pue pasar?. Si entames na corrada de casa un amagüestu, invites a xente, y pones música, y pasa per delantre ún de la SGAE, ¿habrá problemes?. A un peluqueru píeden-y un montón d'euros por poner la radio na so peluquería... Exemplos tenemos a esgaya. ¿Por qué se permite esto dende'l poder políticu?. ¿Por qué nun se cambia la llexislación y en paz?. ¿Tamos pagando ente tolos ciudadanos los favores propagandísticos de ciertos grupos de presión "artísticos" al señor ZP nes últimes elecciones?. Paezme que la cuestión va per ehí.
Si'l Conceyu contrata a Los Berrones (o a cualesquier grupu) y-yos paga, ¿nun ta pagando yá los derechos d'autor, precisamente a los autores?
Prestaríame saber qué espertos en folclor asturianu tien la SGAE pa saber si un cantar tradicional tien arreglos o'l puntu que lu canta lo fai siguiendo la tradición estrictamente. Si Héctor Braga, por poner un casu, sal cola zanfoña cantando un cantar, tal como-y lu cantó nun sé que vieyu nun pueblu, ¿esto entós nun ta suxeto a la SGAE? ¿Les bandes de gaites que fain arreglos a los cantares tradicionales tán na SGAE? ¿Cómo ye entós que la SGAE les representa?
Va pocu salió na tele'l casu de Fuente Ovejuna (Córdoba), onde dende va unos años representen (los vecinos, rollu amateur, non actores profesionales) la obra de Lope de Vega que lleva'l nome'l pueblu. Agora sal la SGAE y diz que REPRESENTEN LOS DERECHOS D'AUTOR DE LOPE DE VEGA. Dios, ¿va cuánto que morrió esti home? La so obra, ¿nun ye yá patrimoniu de la humanidá? A too esto hai que dicir qu'en Fuente Obejuna nun saquen nengún provechu económicu, ye namás un actu cultural que fai'l Conceyu colos vecinos. En fin... de llocos.
¿Y cuantes perres perderia la Sgae si los conceyos se plantasen y nun ficiesen fiestes? ¿Canciar na ducha ye delitu? Como oyese todo poles cañeries ¿Sí dalgún vecin ye de la Sgae?
Póngome a xiblar una canción y unos amigos, o la xente que pasa al mi llau, siéntenla y escuchen...¿qué pué pasar?
Gabis