El Conceyu d'Uviéu concede'l V Premiu Nacional de Folclore "Martínez Torner" a Silvino Antuña

El Conceyu d'Uviéu otorgó'l V Premiu Nacional de Folclore 'Martínez Torner', convocáu pola Escuela Muncipal de Música Tradicional Asturiana, a Silvino Antuña. El premiu entregaráse'l día 24 de payares del 2009 a les 19.30 hores na Sala de Cámara del Auditoriu Príncipe Felipe.
 
Silvino Antuña Suárez, xastre de profesión, d'ehí'l so alcuñu "Selvino'l Xastre", tuvo  siempre como pasión la canción asturiana. Utilizó los llocales de la sastrería que rexentaba en Sotrondio como improvisada escuela, que llegaría a constituyise baxo la so direición como "Academia de Canción Asturiana", col patrociniu de la Diputación Provincial d'Asturies, pela que pasaron munchos de los intérpretes de la Cuenca del Nalón y tamién del restu d'Asturies.

Al so llabor d'enseñanza añádese'l so trabayu de recopilación discográfica y documental de la canción asturiana. Dueñu d'un inmensu archivu discográficu de Tonada, siempre tuvo les puertes abiertes al que quiso somorguiase nes cuestiones de la música asturiana. L'afición de Silvino naz ya nos sos primeros años, lligada al negociu familiar, los so padres rexentaben un bar nel so pueblu natal, La Piquera, y ellí, siendo neñu, sentía a los cantadores clientes del establecimientu, ente otros Ceferino, 'El Ferrolanu' y Arsenio, 'El Ponlenchu'. Dempués, n'Uviéu, entraría en contactu con 'El Maragatu', 'Los Cuatro Ases' y Fernando Cue.