La "idea d'Asturies" va protagonizar el X Seminariu d'Estudios Asturianos

Durante los díes 21 y 22 d'esti mes de payares la Fundación Belenos va desendolcar la décima edición del so Seminariu d'Estudios Asturianos, nesta ocasión baxo'l títulu de "Un llugar nel mundu. Conxusta alrodiu d'una idea d'Asturies". Esta edición, como ye davezu, va allugase na Puela d'Allande.

El programa d'actividaes d'esti seminariu entama'l sábadu 21 a les 10:30 cola inauguración del mesmo. A les 11 va ser la primer ponencia, a cargu del profesor de la Universidá d'Uviéu Xosé Lluis García Arias, col títulu de "La transición asturiana: un proyeutu que nun pasó de proyeutu". A les 12:30 va ser el xeógrafu Benxamín Méndez García el que va falar de "Asturies, un paraiso na encruciyada". Yá pela tarde, a les 17:00, l'ensayista Luis Arias Argüelles-Meres va esponer "Una visión de Asturias desde el republicanismo". Darréu, a les 18:30, l'historiador Faustino Zapico va falar sobre "Asturies, memoria ya identidá colectiva". Yá pela nueche va celebrase un "Filandón. Fiesta asturiana de nueite".

El domingu 22, a les 12:00 hores, va tener llugar un conceyu abiertu col títulu de "Asturies, un llugar nel mundu", nel qu'amás de los ponentes mencionaos van participar el periodista Xuan Cándano, asi como David Rivas, que ye profesor de la Universidad Autónoma de Madrid, y Inaciu Llope, per parte de la Fundación Belenos. Darréu de la xinta va pesllase'l seminariu.

La inscripción nesti seminariu val 40 euros o 60 si ye en réxime de pensión completa. Pa más información puede contactase en seminariubelenos@gmail.com o nel teléfonu 616 242 319. Asturies.com ufre a los sos llectores el programa completu nun archivu (pdf) adxuntu a esta noticia.