El Tribunal d'Estrasburgo declara que'l crucifixu nes aules ye "una violación" de la llibertá

El Tribunal d'Estrasburgo o Corte Europea de los Derechos Humanos declaró la presencia de los crucifixos nes aules "una violación de los derechos de los padres a educar a los sos fíos según les sos convicciones" y de la "llibertá de relixón de los alumnos".

   La sentencia del tribunal européu respuende al recursu presentáu por Soile Lautsi, una ciudadana italiana d'orixe finlandés, que nel 2002 pidiere al institutu estatal nel qu'estudiaben los sos dos fíos que quitaren los crucifixos de les clases.

   Dempués d'abondos intentos en baldre ante los tribunales intalianos, la muyer recurrió al Tribunal Européu de los Derechos del Home, qu'esta mañana-y dio la razón y declaró'l vezu italianu d'esponer un crucifixu nes aules de les escueles públiques como una violación de los derechos fundamentales.

   Agora, el Gobiernu italianu deberá pagar a Lautsi una indemnización de 5.000 euros polos daños morales sufríos. Amás, trátase de la primer sentencia que la Corte d'Estrasburgo emite en materia d'esposición de símbolos relixosos nes aules.

   La reaición del Vaticanu al respeuto foi prudente y, pel momentu, nun quiso comentar la noticia, polo menos hasta que se publiquen les motivaciones de la sentencia. "Pienso que ye necesario reflexonar enantes d'entamar", esplicó'l director de la sala de prensa del Vaticanu, Federico Lombardi.