Entamen les Xornaes Internacionales d'Estudiu de l'ALLA

Les XXVIII Xornaes Internacionales d'Estudiu de l'Academia de la Llingua Asturiana entamen esti martes 3 de payares na Facultá de Filoloxía de la Universidá d'Uviéu hasta'l xueves 5. Estes xornaes, yá clásiques, pretenden afondar nel conocimientu d'aspectos llingüísticos, sociollingüísticos y lliterarios del dominiu llingüísticu asturianu, y pa ello cuenta con espertos d'Asturies y internacionales.

Na presentación Ana Cano recordó la dificultá que supón organizar esti conceyu internacional añu tres añu, y señaló que l'Academia cuenta cola suerte de la bona respuesta y collaboración de los participantes, y añadió que la cita siempre cuenta con una bona acoyida de públicu. De la mesma manera, anunció que'l próximu añu les xornaes serán un homenaxe al profesor y ex presidente de l'Academia Xosé Lluis García Arias.

Toles ponencies, alderiques y comunicaciones van desarrollase a partir de les 16:30 de la tarde nel Salón d'Actos de la Facultá de Filoloxía. El programa completu pueden consultase nesti enllaz (pdf).