El Conceyu d'Ayer pide la suspensión de la tramitación de la llinia eléctrica Sama-Velilla

El Conceyu d'Ayer aprobó por unanimidá una moción na que pide que'l promotor de la llinia eléctrica Sama-Velilla suspende la tramitación del proyectu actual. El documentu plantega, nesti sen, la necesidá de que la evaluación d'impactu ambiental de l'actuación vuelva entamase "incluyendo na mesma l'estudiu de toles alternatives, tanto de trazáu como funcionaes que, amás de ser técnicamente vidables, amenorguen l'impactu propiu de la llinia".

   Los grupos municipales del conceyu ayerán presentaron esta moción conxunta qu se suma a otres iniciatives plantegaes pa lluchar contra esti proyectu eléctricu que cuenta col refugu de tola corporación, al considerar que va conllevar un impactu negativu pal conceyu dende los puntos de vista turísticu, ambiental y económicu.

   Ye por eso que'l plenu municipal dio lluz verde a esti documentu nel que se plantega la necesidá de suspender la tramitación. La resolución aprobada treslladaráse agora a Rede eléctrica Española, al Gobiernu central y al Principáu. Nesti sen, la moción prevé tamién requerir a los órgnaos de les alministraciones públiques pa que "actúen conforme a les sos respectives competencies col envís de fornir l'íntegru cumplimientu de les presentes resoluciones".

   Amás, d'esta moción conxunta del equipo de Gobiernu socialista, PP y IU, el plenu ayeranu aprobó, tamién por unaimidá, una propuesta d'IU pa crear un grupu de trabayu compuestu por políticos, espertos y asociaciones de memoria histórica.

   Un órganu que se pondrá en marcha y que, según informaron dende la coalición, tendrá como oxetivos "la ellaboración d'un detalláu informe sobre los fueyos comunes del conceyu pa la so posterior dignificación y la realización d'un catálogu de símbolos franquistes pa la so eliminación definitiva".