La conseyera de Cultura anuncia un conceyu col Ministeriu pa la conservación del prerrománicu asturianu
|
30 Ochobre, 2009 por E.P. / Redacción
- Inicie sesión o rexístrese pa espublizar comentarios
La conseyera de Cultura y Turismu del Principáu, Mercedes Álvarez González, anunció en rueda prensa la convocatoria d'un conceyu col Ministeriu de Cultura, la Ilesia, y los conceyos, pa debatir sobre la conservación, el caltenimientu, l'espardimientu y la puesta en valor de los monumentos prerrománicos asturianos.
El conceyu, que tendrá llugar el próximu 30 de payares n'Uviéu, pretende, según informó la conseyera, reforzar los canales de comunicación ente les entidaes rellacionaes colos monumentos. De la mesma manera, "el destín del plan prerrománicu saldrá d'esti conceyu, pero tomará como base d'actuación los planes anteriores", esplicó Álvarez González.
Demientres el conceyu de prensa, la conseyera aseguró que'l Grupu Socialista nel Congresu de los Diputaos plantegó la concesión d'una partida de 300.000 euros adicionales nos presupuestos xenerales del Estáu pal 2010, que se sumaríen a los 90.000 euros presupuestaos, y que se destinarán al prerrománicu asturianu.
Per otra parte, la conseyera y el director xeneral de Patrimoniu, José Luis Vega, informaron de los acuerdos adoptaos nel Plenu del Conseyu de Patrimoniu Cultural d'Asturies celebráu güei. Demientres el mesmu tratáronse 25 asuntos, na so mayoría rellacionaos cola declaración como Bien d'Interés Común (BIC) y el determín del entornu de proteición de determinaos bienes.
Nesa llinia, la conseyera enumberó les cueves y abrigos pa les que s'entamará a tramitar l'entornu de proteición. Ente elles cuenten El Buxu, Peña de la Morca, en Cangues d'Onís; Cueva del Conde; Los Torneiros I y II, y Abrigo de Santo Adrianu; Entefoces, en Morcín, Peña del Alba y Abrigos del Falo, Soberaos y Berodia, en Cabrales, Cordoveganes, en Llanes y Demo en Boal.
Tamien s'acordó nel conceyu entamar los trámites pa declara BIC el conxuntu etnográficu de San Salvador de Valledor, de la mesma manera que'l pozu mineru de San Luis de la Nueva, la Ilesia de San Jorge de Manzaneda, el conxuntu históricu de Banduxu y el pozu Santa Bárbara de Turón.
Tamién esplicó la conseyera que'l conseyu de Patrimoniu fixará un entornu de proteición pa la Fuente de los Cuatro Caños de la Corredoria, n'Uviéu, y el Palaciu de Prelo en Bual.
Efrén d'Andrés
Comentarios
Que igüen Abamia que paez una discoteca
Gabis
Pa los chiflonarios, esto ye, pa los cuatro chiflaos que nos interesamos por estes coses, el prerrománicu o arte asturianu ye una de les mayores ayalgues culturales del nuestru patrimoniu material.
Lo que reconforta d'esto ye'l poder de negociación asturianu: 300.000 euros pal prerrománicu. Ehí ta casi nada. Una bona pila de perres pa enguapiar eso que más nos gusta y que ye único nel mundu. Menos mal que se fai dalgo polo nueso. Y non como esos probes vascos, qu'el pnv arrampló con NAMÁI 2,000.000 (dos millones, lleístis bien) d'euros pa les ikastoles.
Más d'una vez sentí a della xente qu'eses ilesies del Arte Asturianu había que tirales porque amás de ser cosa de cures yeren de tiempos de los reis asturianos, y qu'había que ser republicanos, del pasáu facer "añicos" y eses coses que de xuro que dalgún sentísteis más d'una vez.
Gabis
Yo una cosa emparentada con esto sentilo na Campa Torres de Xixón. Ellí un señor recriminaba a un rapaz que lu llevare ellí (¿el fíu quiciabes?) que se gastaren perres neses babayaes en vez de usales pa llevantar cases pa obreros. Por eso, el to comentariu y milenta otros más nesti sen que se podríen añadir, caltengo que'l nacionalismu asturianu tien que ser, penriba de too, IDENTITARIU. Lo que ta en peligru, por primer vez nuna historia de más de mil años, ye la IDENTIDÁ ASTURIANA. Pero esti planteamientu nun ye mayoritariu ente los que se denominen "nacionalistes asturianos". Allá ellos. Si esti tema nun lu ponen clarísimamente na primer llinia reivindicativa, comigo que nun cuenten pa nada. Les coses clares y ensin tapecimientos.