El cantautor asturianu Alfredo González va representar a Asturies esti sábadu 31 d'ochobre nel festival Liet International, eventu musical nel que distintos artites ufren los sos canteres en llingües minoritaries. El cantautor asturianu va interpretar el tema 'La nada y tu', elexíu 'Meyor Cantar en Llingua Asturiana 2009'. Dende'l Gobiernu asturianu confirmen que la directora xeneral de Política Llingüística, Consuelo Vega, desplazaráse a la población holandesa de Leeuwarden (capital de Frisia), p'asistir al actu.

Dende la Conseyería de Cultura del Gobiernu del Principáu d'Asturies destacóse que'l Festival musical internacional Liet, consideráu la eurovisión de les llingües minoritaries, ye un "escaparate inmeyorable" pa dar a conocer la llingua asturiana y "la calidá de la música fecha n'asturianu nesti momentu". 

   Pal Principáu, "esti alcuentru ye un escaparate inmeyorable pa dar a conocer la llingua asturiana fuera d'España y permitir qu'ún públicu ampliu aprecie la calidá de la música fecha n'asturianu nesti momentu" y recordó que "esti Festival nació nel añu 2002, dando continuidá a un veteranu concursu da canción frisona --llingua falada nes zones fronterices ente Países Baxos y Alemaña--, que recibía'l nome de 'Liet Ynternasjinaal'". "Dada la repercusión y l'interés mediáticu que la competición algamare, entamó ampliase progresivamente'l so radiu d'aición cola idea de mostrar y apoyar la gran diversidá llingüística existente nel continente européu, y espardir les distintes propuestes musicales qu'usen estos idiomes".

   Según esplicó'l Principáu, "la cooperación del Gobiernu del Principáu d'Asturies cola Fundación Liet afitóse a lo llargo d'esti añu, cuando se xestionó la participación nel Festival Liet d'un representante oficial d'Asturies, que diba ser el ganador del 'Premiu al Meyor Cantar n'Asturianu 2009'".

   La edición d'esti añu celebraráse nel Teatru De Harmonie, de la capital frisona, y nél participarán once grupos o cantantes finalistes. Ente ellos, figuren los cantantes o grupos vencedores de dellos certames rexonales (frisiu, célticu, sami en Laponia, asturianu), a los qu'hai qu'unir otros a los que se convida directamente polos organizadores o elixíos por un Xuráu especializáu.

   El representante asturianu nel xuráu del 'Liet International', ye Lisardo Lombardía, reconocíu especialista musical con una amplia trayectoria como periodista, promotor musical, responsable de la discográfica asturiana Fonoastur y director artísticu del Festival Intercélticu de Lorient.