El Gobiernu del Principáu d'Asturies manifestó'l so apoyu a a la celebración d'un referendu llibre, tresparente y democráticu que permita garantizar el derechu d'autodetermín del pueblu saharaui y qu'acabe cola situación de los refuxaos de Tindouf, que lleven 35 años dependiendo de l'ayuda humanitaria pa sobrevivir.

   Asina lo manifestaron el presidente, Vicente Álvarez Areces, y la conseyera de Bienestar Social y Vivienda, Noemí Martín, al secretariu xeneral del Frente Polisariu, Mohamed Abdelaziz, que participa nes 'Xornaes de Solidaridá col Pueblu Saharaui', que se celebren hasta mañana n'Uviéu.

   Nuna rueda prensa celebra tres l'alcuentru, Noemí Martín recordó la solidaridá d'Asturies col pueblu saharaui que s'espeya en proyectos de cooperación al desarrollu, organizaos al traviés de l'Asociación d'Amigos del Pueblu Saharaui.

   Sorrayó qu'España debe saldar la so deuda histórica con esti colectivu mediante l'apoyu a un referendu llibre y democráticu que-yos permita definir llibremente'l so futuru. "Reclamamos y exiximos que se cumpla la llegalidá internacional pal desarrollu d'esi referendu d'autodetermín del Sahara Occidental", manifestó.

   De la mesma manera, denunció que'l pasáu 8 d'ochobre, siete activistes resultaron deteníos nel aeropuertu de Casablanca, acusaos d'un delitu d'alta traición por dir a visitar los campamentos. Al respeuto, esixó la lliberación de los presos políticos saharauis, "encarcelaos por defender los derechos del so pueblu".

   Pela so parte, el secretariu xeneral del Frente Polisariu allabó la conocencia del presidente del Principáu sobre la situación del Sahara y agradeció al Principáu la so solidaridá y apoyu cola causa.

   Demientres l'alcuentru, Mohamed Abdelaziz pidió a Asturies y a España que faigan lo posible p'algamar una solución política que garantice la paz y el derechu d'autodetermín del Pueblu Saharaui.

   Recordó tamién la reciente visita a Tinduf d'una delegación asturiana, encabezada por Martín, na que pudieron comprobar les estremes condiciones de vida" de los cientes de miles de persones desplazaes por mor de la ocupación del Shara Occidental per parte de Marruecos.

   Abdelaziz aconceyóse güei col eurodiputáu español antonio Masip y les abogaes Gema Arbesú y Ana Taboada. Demientres l'alcuentru trataron la situación de los siete presos saharauis que s'enfrenten a un xuiciu "sumarísimu" y el Derechu d'Autodetermín del pueblu saharaui.

   A la delegación de la República Árabe Saharaui Democrática recibióla tamién l'alcalde d'Uviéu, Gabino de Lorenzo. Al alcuentru asistieron trés doctores, representnates del grupu que trabayó en Rabuni nel 2007, y en febreru d'esti añu y que nesti momentu prepara  un nuevu viaxe pa febreru del 2010.

   Dende l'añu 2003, l'Axencia Asturiana de Cooperación al Desarrollu destinó cinco millones d'euros a diferentes proyectos de solidaridá col pueblu saharaui, más d'un millón nel 2009 pa defender y promocionar los derechos humanos nos territorios ocupaos del Sahara Occidental.